Il-Gvern m’għandux jibqa’ jitnikker fuq ftehim kollettiv li ilu sentejn skadut b’detriment tal-persuni b’diżabilità

It-tnikkir tal-Gvern fuq il-ftehim kollettiv fl-Aġenzija Sapport qed iwassal għal tbatija għall- persuni b’diżabilità li l-Gvern għandu d-dmir jagħtihom servizz permezz tal-istess aġenzija.

Il-ftehim kollettiv f’din l-aġenzija tal-Gvern ilu skadut sentejn iżda l-Gvern għadu ma wasalx biex jagħlqu, billi jagħti lill-ħaddiema d-drittijiet tagħhom skont prinċipji ċari fid-diversi kwistjonijiet li l-Gvern għadu qed iwebbes rasu fuqhom.

It-tnikkir tal-Gvern qed iwassal sabiex l-Aġenzija Sapport ma tagħtix is-servizz mistenni mill-Gvern lill-persuni b’diżabilità. Dan b’detriment għal komunità vulnerabbli f’pajjiżna li għandha tkun prjiorità tal-Gvern u mhux vittma tat-tnikkir. Minflok il-Gvern għandu jiltaqa’ ma min hu involut biex fl-iqsar żmien possibbli jasal għal ftehim biex il-persuni b’diżabilità ma jibqgħux ibatu.

L-Aġenzija Sapport kienet twaqqfet fl-2003 minn Gvern Nazzjonalista biex tagħti servizzi ta’ appoġġ lill-komunità tal-persuni b’diżabilità u l-familji tagħhom ħalli dawn il-persuni jibqgħu jgħixu fil-qalba tal-lokalitajiet tagħna.

Dawn is-servizzi jinkludu residenzi u ċentri ta’ matul il-jum. Jinkludu wkoll servizzi lill- familji biex dawn ikunu mwieżna fil-missjoni tagħhom li jieħdu ħsieb membri tal-familja b’diżabilità fid-dar tagħhom u fil-komunità.

L-Oppożizzjoni għalhekk se tibqa’ ssus fuq il-Gvern biex ma jibqax jitnikker, u jagħlaq dan il-ftehim kollettiv malajr b’risq il-ħaddiema u b’risq il-persuni b’diżabilità.

Claudio Grech

Kelliem tal-Oppożizzjoni għall-Benesseri tal-Familja u s-Solidarjetà Soċjali

Maria Deguara

Karl Gouder

Kelliem tal-Oppożizzjoni għall-Impjiegi u r-Relazzjonijiet Industrijali

13.09.2018