Il-pensjonanti għandu jkollhom pensjoni adekwata li toffrilhom għajxien tajjeb

“Il-pensjonanti kollha Maltin u Għawdxin jixirqilhom kwalità ta’ ħajja aħjar u għalhekk jridu jittieħdu miżuri fl-immedjat kif ukoll fit-tul biex il-pensjonijiet ikunu sostenibbli u l-ġid li qed jinħoloq mill-ekonomija verament jasal għand kulħadd, b’mod speċjali l-pensjonanti.”, il-Kap tal-Partit Nazzjonalista Adrian Delia qal dan meta ltaqa’ ma’ The Alliance of Pensioners Organisations.

Dr Delia enfasizza kif il-pensjonijiet għandhom ikunu dinjitużi u joffru livelli ta’ għajxien tajjeb lill-anzjani wara li jkunu għamlu snin twal jaħdmu u jikkontribwixxu fis-soċjetà. Huwa spjega kif il-Partit Nazzjonalista, se jagħti l-akbar prijorità lill-pensjonijiet. Għalhekk jeħtieġ li mhux biss jittieħdu miżuri fl-immedjat iżda li jsir ukoll pjan fit-tul li jinkludi mhux biss kemm se jkunu dawk li jikkontribwixxu għall-pensjonijiet imma wkoll l-ammont tal- pensjonanti.

Il-President ta’ The Alliance of Pensioners Organisations Carmel Mallia qal li l-ġid li qed jinħoloq mill-ekonomija mhix jasal għand il-pensjonanti. Huwa rrefera għall-istatistika, li turi kif dawk li għandhom aktar minn 65 sena huma l-aktar li jinsabu fir-riskju tal-faqar. Huwa qal ukoll li matul dawn l-aħħar snin, parti sostanzjali mill-middle class bdiet titnaqqar u l- kwalità tal-ħajja marret lura għall-pensjonanti. Spjega kif l-alleanza mhix kontra l-pensjoni tat-tieni u t-tielet pilastru iżda staqsa fuq is-sostenibbilità tas-sistema preżenti tal-pensjonijiet.

Il-Kap tal-Partit Nazzjonalista Adrian Delia kien akkumpanjat mil-Kelliem tal-Oppożizzjoni dwar il-Benesseri tal-Familja, is-Solidarjetà Soċjali u l-Pensjonijiet ClaudioGrech u mill-Kelliem tal-Oppożizzjoni dwarid-Djalogu Soċjali, l-Volontarjat, is-Soċjetà Ċivili u l-Kuntatt man-Nies Hermann Schiavone.