Mhux soltu nikteb fit-tul.
Iżda xi daqqiet, bla ma trid, tieqaf taħseb u tirrifletti. Taħseb fuq ċertu deċiżjonijiet li tkun għamilt f’ħajtek. Taħseb fuq dak li tixtieq għall-futur ta’ dawk ta’ madwarek.
Deċiżjoni minnhom kienet dik li noħroġ għall-politika mal-Partit Nazzjonalista.
Għamilt hekk għaliex inħoss li f’pajjiżna nibtet wisq il-kultura tax-xejn m’hu xejn. Fejn kollox jista’ jgħaddi mingħajr ma jiġri xejn. Fejn anki jekk tikteb fuq il-mezzi soċjali, tispiċċa attakkata bla ħniena minn nies ma tafhomx, biex jumiljawk, jattakkawk u jipprovaw jirridikolawk.
Forsi għaliex mara?Forsi għaliex kandidata ġdida?Forsi għaliex wieħed jaħseb li bi dritt jista’ jgħid li jrid filwaqt li jinħeba wara l-iscreen.
Kif għamlu diversi persuni oħra qabli li kellhom karrieri oħra u ħarġu għall-politika, jien ukoll iddeċidejt li nagħmel hekk. Għaliex irrid inwaqqaf din il-mibegħda lejn l-individwu. Għaliex irrid nara Malta li timxi ‘l quddiem bis-saħħa tal-kapaċitajiet individwali ta’ kull persuna, il-bogħod mit-tiketti soċjali jew politiċi. Għaliex irrid nara Malta timxi ‘l quddiem għall-ġejjieni tat-tifla tiegħi u ta’ tant eluf ta’ tfal oħra. Għaliex irrid nara Malta li ma tibqax tirrenja l-kultura tax-xejn m’hu xejn u fejn il-flus jistgħu jixtru kollox u lil kulħadd. Il-flus mhux kollox. Għaliex Malta jixraqilha ħafna aħjar minn hekk.
U għalhekk għal ċerti persuni moħbija li ser jikkumentaw – ir-risposta tiegħi hi - li minkejja l-attakki personali kollha jiena ser nibqa naħdem għal għan wieħed.
Għaliex iva, jien irrid Malta li tkun “on again”!!
Ejja nkunu dik il-bidla flimkien!
Do you like this page?
