Din il-ġimgħa kelli esperjenza unika. Esperjenza li tatni l-opportunità li nkun eqreb  u viċin il-familji aktar minn qatt qabel  għax dħalt b’ruħi  u ġismi fil-każ ta’ inġustizzja kbira, fejn il-protagonista kienet se tgħaddi minn tbatija bla bżonn.

Qed nirreferi  għall-każ tat-tfajla Rachel Umanah, li hija persuna b’ Down Syndrome li kienet ġejja lura Malta  minn żjara għand nannietha li jgħixu fin-Niġerja, pajjiż meqjuż bħala  dark red zone.

Intant minkejja li Rachel hija bid-Down Syndrome l-awtoritajiet ma riedux jagħmlu eċċezzjoni magħha u kien se jkollha tqatta’ ġimagħtejn kwarantina f’lukanda hekk kif tasal lura Malta flimkien ma’ ħuha, Daniel u missierha, Patrick, u mġiegħlha tħallas €100 kuljum minkejja li għandha residenza privata – total ta’  €1400 għal kull persuna. Kien appuntu dan li xprunani biex nżur lil Carmen,  omm Rachel, fejn flimkien għamilna appell lill-gvern biex jirrevedi din il-miżura inġusta kemm ma’ Rachel u Maltin oħra li wkoll kienu qed iħallsu €100 kuljum inġustament.   

 

Hija inġustizzja kbira fejn persuni li għandhom residenza  oħra fejn jistgħu jqattgħu l-kwarantina jkollhom jagħmlu l-kwarantina f’lukanda. Dan huwa piż finanzjarju bla bżonn għall-familji Maltin u Għawdxin.   Filwaqt li x-xogħol tal-awtoritajiet tas-Saħħa huwa rispettat,  hemm bżonn li jieħdu inkonsiderazzjoni ċirkustanzi speċjali  ta’ persuni b’mod speċjali dawk li jkollhom diżabilità. Meta dawn in-nies jiġu mġiegħla jagħmlu kwarantina f’lukanda, f’ambjent differenti u mhux familjari għalihom, jiffaċċjaw tbatijiet bla bżonn.

 

 

Huwa nkoraġġanti iktar w iktar  meta tara li petizzjoni li bdejt it-Tnejn filgħodu, sabet l-appoġġ ta’ mijiet, aktar minn 1200 firma f’jumejn, li flimkien magħna, għenu fil-kawża sabiex il-Gvern fehem li s-sitwazzjoni ma setatx tippersisti.

 

 

Is-sens komun rebaħ.  Minn dan kollu nistgħu ngħidu li minkejja li ninsabu fl-oppożizzjoni, qegħdin nagħmlu d-differenza fil-ħajja tan-nies.  Nirringrazzja lil dawk kollha li għenu u appoġġjaw dan l-appell imqanqal biex Rachel illum qed tqatta’ t-tieni jum tal-kwarantina tagħha f’darha flimkien ma’ niesha.

 

Ryan Callus

About

Kandidat f'isem il-Partit Nazzjonalista għall-Elezzjoni Ġenerali fuq is-6 u is-7 Distrett.