Sejħa għat-twaqqif ta’ inkjesta speċjali u għat-teħid ta’ azzjonijiet oħrajn dwar il-qtil ta’ Daphne Caruana Galizia

Stqarrija tal-Kap tal-Oppożizzjoni wara l-aħħar żviluppi fil-Qrati, fil-Parlament u fil-media dwar il-qtil ta’ Daphne Caruana Galizia

Fid-dawl tal-aħħar żviluppi dwar il-qtil tal-ġurnalista Daphne Caruana Galizia, hu ċar li l- Gvern ma wettaqx dmiru sewwa la qabel il-qtil biex jipprevenih u lanqas wara biex jinvestigah sewwa u jsib min qabbad dan il-qtil.

Fost l-aħħar żviluppi hemm:

• il-kundanna tal-Qorti Kostituzzjonali għall-mod kif tmexxiet l-investigazzjoni dwar dan

  il-qtil bl-involviment tar-raġel ta’ Ministru;

• l-ammissjoni li għamel fil-Parlament il-Ministru Chris Cardona li għandu qrubija ma’

  wieħed mill-akkużati bil-qtil u li kien f’bachelor’s party miegħu; u

• ir-rivelazzjonijiet fil-media Taljana li Chris Cardona rċieva telefonata mingħand l-istess

  persuna li eżatt wara ċemplet lil wieħed mill-akkużati bil-qtil.

  Fid-dawl ta’ dawn l-iżviluppi, l-Oppożizzjoni qed titlob lill-Gvern biex iwaqqaf kummissjoni speċjali, awtonoma u indipendent dwar dan il-qtil li tkun tgawdi fiduċja wiesgħa fil-pajjiż. Din il-kummissjoni speċjali għandha:

• tidentifika n-nuqqasijiet li seħħew fil-protezzjoni li l-Gvern kellu jagħti lill-ġurnalista

  maqtula u baqa’ ma tahiex;

• tistħarreġ x’kienu jafu l-awtoritajiet dwar movimenti li kienu qed iseħħu u li setgħu

  jindikaw theddida għall-ħajja ta’ Daphne Caruana Galizia; u

• tinvestiga jekk l-awtoritajiet naqsux milli jaġixxu tempestivament fid-dawl ta’ dak li

  kienu jafu biex jipproteġu ħajjet il-ġurnalista qabel inqatlet.

  Apparti l-protezzjoni li messha ngħatat lill-ġurnalista qabel inqatlet, sena mill-qtil tagħha għad mhux identifikat il-mandant li qabbad li tinqatel. Din hi ħaġa gravi u ta’ import politiku kbir f’dan il-każ.

  Għalhekk l-Oppożizzjoni qed titlob lill-Gvern:

• Jgħid ċar x’għamel u x’għadu qed jagħmel il-Korp tal-Pulizija biex isib il-mandant li

  qabbad dan il-qtil;

• Ineħħi lill-Kummissarju tal-Pulizija preżenti li ġie kundannat mill-Qorti għal

  investigazzjoni mdardra bl-involviment tar-raġel ta’ Ministru u li evidentement għandu

  jkun taħt investigazzjoni tal-kummissjoni speċjali; u

• Jaħtar Kummissarju tal-Pulizija serju li, anke jekk tard, jibda jidderieġi b’indipendenza t-

  tiftix u l-qbid tal-mandant li qabbad dan il-qtil.

  Adrian Delia

  Kap tal-Oppożizzjoni u Kelliem għall-Ġustizzja u l-Governanza Tajba

  11.10.2018